台大客家社簡介
黃脩閔、張穗風 2024.02著
[客文]
台大客家研究社（英文：NTU Hakka，底下簡稱台大客家社），創立在1991年，解嚴之後个還𠊎母語運動浪潮裡肚。
在1988年還𠊎母語運動个時節，本土語言个意識開始興盛，台灣大學个學生成立了台大台語文社，客家社本來在台語文社底下，到了1990年開始有客家研究社獨立成社个討論，12月27號開了第一擺个籌備會，到了1991年3月20號正式成立台大客家社。一開始主要係開客話教學班、舉辦客話演講比賽，後來慢慢轉成用無共樣个形式同活動，像係介紹無共樣个國家个客家社群、醫護客話、用客話搞桌遊个方式，來餳後生仔加入客家社。
台灣有愛兩成的人口係客人（有客家血統同關係，加上自我認同係客人），主要分布在桃竹苗、台中東勢、雲林崙背、高屏个六堆地區，還有花東縱谷，腔調主要係四縣、海陸、大埔、饒平、詔安這兜。在人口從傳統个農業庄頭入到都市地區，還有網路資訊流通發達个背景底下，客家語言同文化作為無恁強勢个語言同文化，就跈等時代个變化慢慢流失忒了。
故所，學生自家組成台大客家社，提供了一個平台分有客家認同，係無就係對客家文化有興趣个同學來共下交流，毋單淨做得強化客家个認同感，乜做得分客家族群內部同其他族群去做交流，在日常生活裡肚「做客家」。同時，乜分台灣社會上个大家去愐講，客話作為一種國家語言，過去受到仰般个歷史傷害、留下仰般个語言傷口，來到現下个台灣社會之後，又堵著仰般个威脅，𠊎等做得仰般反省，提出仰般个解決方式。
乜邀請大家去愐講「你麼个時節會用到本土語言？在麼个情況底下？摎麼人溝通？麼个時節會講著自家个族群認同？族群認同係仰般出現？做麼个會感覺到台灣个語言文化當重要？甚至想愛投入？對抗淰淰个華語慣性／華語霸權社會，需要哪兜成本？你想像个多語社會，係麼介樣勢？在台灣應該仰般去實現？」
[華文]
台大客家研究社（英語：NTU Hakka，以下簡稱台大客家社），創立於1991年，解嚴後的還我母語運動浪潮之中。
隨著1988年還我母語運動後，本土語言意識興起，台灣大學的學生成立台大台語文社，客家社原本是在台語文社底下，1990年開啟了客家研究社獨自成立社團之討論，12月27日召開第一次的籌備會，直至1991年3月20日正式成立台大客家社。早期主要開設客語教學班、舉辦客語演講比賽，近期則轉向透過不同的媒介與活動模式，如介紹國際上的客家社群、醫護客語、客語桌遊等方式，吸引年輕人加入客家社。
台灣擁有近兩成的人口為客家人（擁有客家血緣或淵源，加上自我認同為客家人），主要分布於桃竹苗、台中東勢、雲林崙背、高屏的六堆地區，以及花東縱谷，腔調包含四縣、海陸、大埔、饒平、詔安等。在人口從傳統農村聚落湧入都會地區，以及網路資訊流動頻繁的狀況下，客家語言及文化作為非強勢語言及文化，隨著時代更迭而逐漸流失。
為此，由學生自發組成的台大客家社，提供一個平台給具有客家認同或對客家文化有興趣的同學互相交流，不僅可以強化客家認同，更可促進客家族群內部以及和其他族群的交流，在日常生活中「做客家」。同時，也讓大眾反思，客語作為國家語言之一，曾經歷過怎樣的歷史創傷、語言傷痕，至今在台灣社會，客家語言族群文化面臨如何之危機、可以如何反省，甚至是解方。
也邀請大家思考「你什麼時候會用到本土語言？在什麼情境？和誰溝通？什麼時候會提到自己的族群認同？族群認同如何出現的？為什麼會感覺台灣的語言文化很重要？甚至想要投入？對抗濃厚的華語慣性/華語霸權社會，需要哪些成本？你想像中的多語社會，長什麼樣子？在台灣應該如何實現？」
